ලොව ප්‍රථම අගමැතිනිය ලෙස ලෝක දේශපාලනයේ මෙන්ම මෙරට දේශපාලනයේ අමරණීය නාමයක් සනිටුහන් කළ සිරිමාවෝ බණ්ඩාරනායක මැතිනිය දැයෙන් සමුගෙන අදට (10) වසර 25ක් සපිරේ. ඒ නිමිත්තෙන් සංවිධාන කරන ගුණසමරු උත්සවය හුනුපිටිය ගංගාරාම විහාරස්ථානයේදී අද (10) පැවැත්වේ. විහාරාධිපති ආචාර්ය කිරින්දේ අස්සජී නාහිමිපාණන් වහන්සේගේ ආශිර්වාදයෙන් ශ්‍රී ලංකා නිදහස් පක්ෂයේ සභාපති නීතිඥ නිමල් සිරිපාල ද සිල්වා ඇතුළු පක්ෂයේ නිලධාරී මණ්ඩලයේ ප්‍රධානත්වයෙන් ගුණසමරු පින්කම පැවැත්වෙයි. මෙහිදී මහා සංඝරත්නය විෂයෙහි දහවල් දානමය පින්කමක් හා සංඝගත දක්ෂිණාවක් ද පැවැත්වේ. ශ්‍රී ලංකා නිදහස් කාන්තා පෙරමුණ නිලධාරී මණ්ඩලයේ හා පක්ෂයේ ක්‍රියාකාරී සාමාජිකයන් රැසක් මේ අවස්ථාවට සහභාගි වීමට නියමිතය.