මොරටුව මහ නගර සභාවේ හිටපු නගරාධිපති සමන්ලාල් ප්‍රනාන්දුමහතා අද (සැප්තැම්බර් 23) ඇප මත මුදා හැරීමට කොළඹ ප්‍රධාන මහේස්ත්‍රාත් අසංග එස්. බෝදරගම මහතා නියෝග කළේය. රජයට රුපියල් මිලියන 105ක පාඩුවක් සිදුකිරීම සම්බන්ධයෙන් අල්ලස් කොමිසම විසින් ඔහු අත්අඩංගුවට ගෙන රක්ෂිත බන්ධනාගාරගත කර තිබුණි 2013 වසරේදී වරාය හා මහාමාර්ග අමාත්‍යාංශය මඟින් ‘මඟ නැගුම’ වැඩසටහන යටතේ මාර්ග සංවර්ධනය සඳහා මොරටුව නගර සභාවට වෙන් කළ රුපියල් මිලියන 105ක ප්‍රතිපාදන සම්බන්ධයෙන් මෙම චෝදනාව එල්ල වී ඇත. අල්ලස් කොමිසම චෝදනා කරන්නේ, හිටපු නගරාධිපතිවරයා රාජ්‍ය මුදල් රෙගුලාසිවලට පටහැනිව, මෙම මුදල් හිතවත් කොන්ත්‍රාත්කරුවන් අට දෙනෙකුට ලබා දී රජයට පාඩු කළ බවයි. පරීක්ෂණ නිලධාරීන් අධිකරණයට දැනුම් දුන්නේ, මෙය දූෂණ වරදක් බවත්, සැකකරු ඇප මත මුදා හැරියහොත් සාක්ෂිකරුවන්ට බලපෑම් කිරීමට ඉඩ ඇති බවත්ය. කෙසේ වෙතත්, දෙපාර්ශවයේම කරුණු සලකා බැලූ මහේස්ත්‍රාත්වරයා, සැකකරු රුපියල් පනස් දහසක මුදල් ඇපයක් සහ රුපියල් ලක්ෂ දහය බැගින් වූ ශරීර ඇප තුනක් මත මුදා හරින ලෙස නියෝග කළේය. එසේම, ඔහුගේ විදෙස් ගමන්ද අධිකරණය විසින් තහනම් කර තිබේ. මෙම සිද්ධිය සම්බන්ධයෙන් මොරටුව නගර සභාවේ සේවය කළ නිලධාරීන්ගෙන්ද ප්‍රකාශ ලබා ගැනීමට නියමිත බව පරීක්ෂණ නිලධාරීහු වැඩිදුරටත් අධිකරණයට දැනුම් දුන්හ.